ÜST, AzPC və TƏBİB peyvəndlənmənin əhəmiyyəti ilə bağlı Şirvan şəhərində maarifləndirmə tədbiri keçiriblər

Oktyabrın 27-də Avropa İttifaqının maliyyə dəstəyi ilə Azərbaycan Pediatriya Cəmiyyəti (AzPC), Ümumdünya Səhiyyə Təşkilatı (ÜST) və Tibbi Ərazi Bölmələrini İdarəetmə Birliyi (TƏBİB) Şirvan Şəhər Mərkəzi Xəstəxanasında peyvəndlənmə ilə bağlı maarifləndirmə tədbiri keçirib.

Medicalmedia.az xəbər verir ki, “Mifə yox, elmi sübutlara inanaq: Peyvəndlə bağlı biliklərin artırılması üzrə təlim” adı ilə baş tutan tədbir ÜST-nin Səhiyyə Nazirliyi və İcbari Tibbi Sığorta üzrə Dövlət Agentliyi ilə də apardığı sıx əməkdaşlıq çərçivəsində təşkil olunub. Təlim ÜST-nin Avropa İmmunlaşdırma Gündəliyi 2030 təşəbbüsünə uyğun olaraq “Heç bir uşağı peyvənddən kənarda qoymayaq” şüarı altında keçirilib.

Təlimi keçirməkdə məqsəd tibb işçilərinin və valideynlərin peyvəndlənmə ilə bağlı məlumatlılığını artırmaq, doğru bilinən yanlışlıqlara aydınlıq gətirmək və xəstəliklərdən qorunmaqda vaxtında vurulan peyvəndin əhəmiyyətini elmi sübutlar əsasında diqqətə çatdırmaqdır.

Tədbiri giriş sözü ilə açan Şirvan Şəhər Mərkəzi Xəstəxanasının direktoru Pərviz Rüstəmbəyov və AzPC-nin İdarə Heyətinin sədri Erkin Rəhimov çıxış edərək peyvəndin uşaqların sağlamlığının qorunmasında mühüm rola malik olduğunu vurğulayıblar. Mütəxəssislər valideynlərə və tibb işçilərinə müraciət edərək, bu məsələdə uşaqlara qarşı daim diqqətli olmağı və peyvəndlə bağlı rəsmi və etibarlı mənbələrə etibar etməyi tövsiyə ediblər.

Daha sonra tədbirin birinci hissəsində Şirvan şəhərində yaşayan və peyvənd vaxtını gecikdirən 7 yaşa qədər uşaqların valideynləri ilə görüş keçirilib. AzPC-nin pediatrları Erkin Rəhimov, Əli Quliyev və Nigar Bayramova tərəfindən valideynlərə peyvəndin əhəmiyyəti haqqında ətraflı informasiya verilib, peyvəndlə bağlı tərəddüdlər barəsində müzakirələr aparılıb və onların sualları cavablandırılıb.

Günün ikinci hissəsində isə AzPC-nin mütəxəssisləri tibb işçiləri üçün peyvəndlə əlaqədar mühüm mövzularda sessiyalar keçirərək, onlara geniş məlumat verib. Sessiyalar rutin vaksinasiya, peyvənd tərəddüdü, peyvəndlə qarşısı alına bilən müxtəlif xəstəliklər üzrə mövzuları əhatə edib. Bundan başqa, tibb işçilərinin peyvəndlənmə ilə bağlı biliklərini yoxlamaq və tədbirin səmərəliliyini qiymətləndirmək məqsədilə təlimdən əvvəl və sonra onlayn test keçirilib.

Qeyd edək ki, tədbirdə Şirvan Şəhər Mərkəzi Xəstəxanası, həmçinin Sabirabad, Saatlı, Salyan, Biləsuvar, Neftçala, Hacıqabul, İmişli və Kürdəmir rayon mərkəzi xəstəxanalarının, eyni zamanda bu bölgələrdə yerləşən bir sıra dövlət tibb müəssisələrinin pediatrları, vaksinatorları və tibb bacıları iştirak edib.

Təlimdə ümumilikdə 44 valideyn və 117 tibb işçisi iştirak edib. Hər iki hissənin sonunda valideynlərə və tibb işçilərinə sertifikat təqdim olunub. İştirakçılar təlimdə peyvəndlə bağlı yeni məlumatlar əldə etdiklərini, bu kimi canlı müzakirə əsasında təşkil olunan maarifləndirmə tədbirlərinin çox faydalı olduğunu bildiriblər. Bir çox valideyn tezliklə övladlarının peyvəndlənməsi üçün tibb müəssisələrinə müraciət edəcəyini bildirib. Tibb işçiləri isə vaksinasiya ilə bağlı əhalini daha çox və operativ qaydada maarifləndirəcəklərini qeyd ediblər.

Qeyd edək ki, Şirvan şəhərində keçirilən sözügedən maarifləndirmə tədbiri növbəti aylarda Avropa İttifaqının dəstəyi ilə ÜST, AzPC və TƏBİB tərəfindən ölkənin bir sıra şəhərlərində də təşkil olunacaqdır.