TƏBİB-in dəstəyi ilə “II Beynəlxalq Qastroenteroloji və Cərrahiyyə Günləri” adlı konfrans keçirilib

Tibbi Ərazi Bölmələrini İdarəetmə Birliyinin (TƏBİB) dəstəyi, Gəncə Şəhər Birləşmiş Xəstəxanasının və Azərbaycan Qastroenterologiya və İnvaziv Endoskopiya Cəmiyyətinin (AQİEC) təşkilatçılığı ilə Ümummilli Lider Heydər Əliyevin 100 illiyinə həsr olunan “II Beynəlxalq Qastroenteroloji və Cərrahiyyə Günləri” adlı konfrans keçirilib.

Medicalmedia.az xəbər verir ki, konfransda ilk olaraq şəhidlərimizin əziz xatirəsi bir dəqiqəlik sükutla yad edilib. Daha sonra Azərbaycan Respublikasının və Türkiyə Cümhuriyyətinin dövlət himnləri səsləndirilib.

Açılış nitqi ilə çıxış edən Gəncə Şəhər Birləşmiş Xəstəxanasının direktoru İlkin İsmayılov iştirakçıları salamlayıb və Gəncədə tibb sahəsində görülən işlər barədə ətraflı məlumat verib.

TƏBİB-in İcraçı direktoru Vüqar Qurbanov konfrans iştirakçılarına müraciət ünvanlayıb. Müraciəti TƏBİB-in İxtisaslı tibbi yardım departamentinin Tibbi xidmətlərin təşkili şöbəsinin müdiri Vüsal Yusifov səsləndirib.

Konfransda çıxış edən Gəncə Şəhər İcra Hakimiyyətinin İctimai-siyasi və humanitar məsələlər şöbəsinin baş məsləhətçisi Yadigar Bədəlov konfrans iştirakçılarına uğurlar arzu edib.

Türkiyənin Gəncədəki baş konsulu Rəcəp Öztop isə çıxışında Azərbaycan-Türkiyə qardaşlığının bütün sahələrdə olduğu kimi, tibb sahəsində də uğurla inkişaf etdiyini bildirib. O, qeyd edib ki, bu cür konfransların keçirilməsi və mütəxəssislərin əməkdaşlığı birgə fəaliyyət baxımından mühüm amildir.

Konfransın təşkilati sədri, Azərbaycan Qastroenterologiya və İnvaziv Endoskopiya Cəmiyyətinin rəhbəri Fərid Quliyev mədə-bağırsaq xəstəliklərinin müayinə və müalicəsində tətbiq olunan yeniliklər barədə fikirlərini bölüşüb, konfransda bu sahədə olan son tədqiqatlar haqqında təqdimatların yer alacağını vurğulayıb.

İki gün davam edən “II Beynəlxalq Qastroenteroloji və Cərrahiyyə Günləri” konfransında 8 panel üzrə 40-a yaxın məruzə təqdim olunub. “Ezofaqus”, “Mədə”, “Öd yolları”, “Mədəaltı vəzi”, “Qaraciyər”, “Transplantologiya”, “Yoğun bağırsaq və düz bağırsaq xəstəlikləri”, “İnvaziv cərrahiyyə” adlı panellərdə Türkiyədən dəvət olunan professor heyəti ilə yanaşı, Bakıdan və Gəncədən olan həkim-mütəxəssislər çıxış ediblər.

Qeyd edək ki, konfransa Azərbaycanın müxtəlif regionlarından 200-ə yaxın qastroenteroloq, terapevt, cərrah və onkoloq qatılıb.
Konfrans Səhiyyə Nazirliyi tərəfindən akkreditasiya olunub. İştirak edən həkimlərə 13 kredit balı verilib.

Tədbirin sonunda məruzəçilərə və iştirakçılara sertifikatlar təqdim edilib.