“Heydər Əliyevin başlatdığı səhiyyə siyasəti uğurla davam etdirilir” - SƏDR

“Ulu Öndər Heydər Əliyevin Azərbaycan səhiyyəsinin inkişafı üçün yaratdığı münbit bir mühitdə tibb sahəsi, səhiyyəmiz öz yeni mərhələsinə qədəm qoydu. Hər sahədə olduğu kimi, səhiyyədə də inkişaf özünü göstərməyə başladı. Bu mərhələdə müstəqil Azərbaycanın memarı və qurucusu, uzaq görən şəxsiyyət Heydər Əliyevin təşəbbüsü ilə azərbaycanlı tibb kadrlarının ölkə xaricində və daxilində yetişdirilməsi ənənəsi başlandı”.

Bunu medicalmedia.az-a Nefroloqlar Cəmiyyətinin sədri Cəbrayıl Cəbrayılov deyib.

O bildirib ki, görkəmli dövlət xadimi Heydər Əliyevin layiqli davamçısı cənab İlham Əliyev də sonradan bu ənənəni uğurla davam etdirdi. “2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı”da bunun ən effektiv nümunəsidir:

“Bu proqram çərçivəsində Azərbaycanın istedadlı gəncləri xarici ölkələrin ən aparıcı, güclü təhsil mərkəzlərində təhsil almış və öz peşəkarlıqlarını təkmilləşdirmişlər. Təhsilini orada başa vurub ölkəmizə qayıdan kadrlar Azərbaycan səhiyyəsinin inkişafında böyük rol oynamış və bu sahənin müsairləşməsinə öz töhfəsini veriblər.

Bunun da nəticəsi olaraq Azərbaycanda böyük elmi cəmiyyətlər fəaliyyətə başladı. Bu cəmiyyətlərdən biri də Azərbaycan Nefroloqlar Cəmiyyətidir. Bu cəmiyyətlər Azərbaycan dövlət orqanları ilə birgə və təkbaşına çoxsayılı elmi konfranslar, elmi-praktiki məşğələlər təşkil etdilər. Bu konfranslarda azərbaycanlı həkimlərin təlim və təcrübələrinin artırılması istiqamətində böyük işlər görüldü. Hal-hazırda da cəmiyyətlərin fəaliyyətində bu tədbirlər davam etdirilir.

Azərbaycan Nefroloqlar Cəmiyyətinin 5 illiyi və Ümumilli lider Heydər Əliyevin 100 illik yubileyi münasibətilə sentyabr ayı üçün planlanan “Azərbaycan Milli Nefroloji” konfransı da bu tədbirlərdən biridir. Bu konfransların təşkili və digər işlərimizdə ölkə daxilində və xaricində fəaliyyət göstərən peşəkar kadrlarımızdan dəstək alırıq.

Qeyd edim ki, cəmiyyətimiz bu konfransları yalnız Azərbaycanda deyil, Azərbaycandan kənarda da keçirir. Bu konfranslar da beynəlxalq səhiyyə cəmiyyətləri ilə birgə təşkil edilir. Bütün bu işlərin aparılmasında Ulu Öndər Heydər Əliyevin başlanğıcını qoyduğu səhiyyə siyasətinin böyük rolu var. Tibbin inkişafı üçün yaradılan bu əlverişli şərait hesabına bu tədbirləri həyata keçirə bilirik”.

Sevinc Hüseynova