“Oftalmoloji xəstəliklərə yeni baxış” panel müzakirəsi təşkil edilib

TƏBİB-in dəstəyilə "Medinex" sərgisinin tədbirlər proqramı çərçivəsində “Oftalmoloji xəstəliklərə yeni baxış” adlı panel müzakirəsi keçirilib.

Medicalmedia.az xəbər verir ki, panel sessiyasında Azərbaycan Tibb Universitetinin Oftalmologiya kafedrasının dosenti, tibb üzrə fəlsəfə doktoru, həkim-oftalmoloq Tural Qəlbinur, Akademik Zərifə Əliyeva adına Milli Oftalmologiya Mərkəzinin uşaq oftalmoloqu Aysel Əkbərova, Akademik Zərifə Əliyeva adına Milli Oftalmologiya Mərkəzinin həkim-oftalmoloqu, tibb üzrə fəlsəfə doktoru Gülnarə Məmmədova, Akademik Zərifə Əliyeva adına Milli Oftalmologiya Mərkəzinin həkim-oftalmoloqu, tibb üzrə fəlsəfə doktoru Yazgül Abdiyeva təqdimatlarla çıxış ediblər.

Tural Qəlbinur “Retina cərrahiyyəsinə müasir yanaşma” mövzusundakı çıxışında pasiyentlər üzərində həyata keçirdiyi əməliyyatlardan bəhs edib. Eyni zamanda sözügedən əməliyyatlardan olan görüntüləri iştirakçılara təqdim edərək, əməliyyat proseslərini izah edib.

Aysel Əkbərova “Yenidoğulmuşlarda göz xəstəlikləri, profilaktikası və müalicəsi” mövzusunda təqdimatla çıxış edib. A.Əkbərova yenidoğulmuşlarda göz patalogiyaları - neonatal konyunktivit, nazolakrimal kanalın obstruksiyası, anadangəlmə katarakta, retiablastoma, anadangəlmə qlaukoma, çəpgözlük, mikroftalm, anoftalm, vaxtından əvvəl doğulmuşların retinopatiyası haqqında məlumat verib, müalicə prosesindən bəhs edib.

Gülnarə Məmmədova çıxışında “Yüksək dərəcəli miopiya xəstələrdə qlaukoma” mövzusunda danışıb. G.Məmmədova miopiya xəstələrdə qlaukoma haqqında, onun müalicə üsulları barədə iştirakçıları məlumatlandırıb.

Yazgül Abdiyeva “Allergik konyuktivitlərin diaqnostikası və müalicəsinə yeni yanaşma” mövzusunda çıxış edib. Y.Abdiyeva allergik konyuktivitlə bağlı ümumi məlumat verib, allergik konyuktivitlərin epidemiologiyasından, təsnifatından, növlərindən, diaqnostikasından və müalicəsindən danışıb.

Sonda iştirakçıların sualları cavablandırılıb, fikir mübadiləsi aparılıb.