İlk dəfə Səhiyyə Menecmenti Zirvəsi baş tutub

Bu gün “Baku Marriott Hotel Boulevard”da Səhiyyə Nazirliyi, Tibbi Ərazi Bölmələrini İdarəetmə Birliyi (TƏBİB), İctimai Səhiyyə və İslahatlar Mərkəzi (İSİM)“, “Sağlam Ailə” Tibb Mərkəzi və “Facemark” şirkətinin ortaq təşkilatçılığı, VISA şirkətinin baş sponsorluğu ilə ölkədə ilk dəfə Səhiyyə Menecmenti Zirvəsi keçirilib.

Medicalmedia.az xəbər verir ki, tədbir “Fərq Yaradır” konsept mesajı ilə bir gün davam edib.

Zirvə “Səhiyyədə dövlət və özəl sektor tərəfdaşlığı”, “Səhiyyədə İnnovasiyalar və Rəqəmsallaşdırma”, “Səhiyyədə Strateji İdarəetmə” panelləri üzrə 3 moderator, 15-dək spiker və 3 məruzəçinin bir araya gətirərək ən yaxşı təcrübələrin mübadiləsinə xidmət edib.

"Sağlam Ailə" Tibb Mərkəzinin İcraçı Direktoru Nigar Rüstəmlinin moderator olduğu “Səhiyyədə Dövlət və Özəl Tərəfdaşlığı” panelində Ankara Bilkent Şəhər Xəstəxanasının Ürək Damar Xəstəxanasının Baş həkimi Mehmet Ali Özatik, “Yeni Klinika”nın direktoru Barat Yusubov, Azərbaycan Respublikası Dövlət Gömrük Komitəsi Tibbi Xidmət İdarəsinin Mərkəzi Hospitalının Rəis müavini Nabil Seyidov, İqtisadiyyat Nazirliyinin Aparatında Layihələrin idarə olunması şöbəsinin Dövlət-özəl tərəfdaşlığı sektorunun müdiri Türkan Vüsət qızı və TƏBİB-in proseslərin optimallaşdırılması şöbəsinin rəhbəri Ziya Məmmədzadə təcrübələrini bölüşüblər.

"Səhiyyədə Strateji İdarəetmə" paneli TƏBİB Strateji inkişaf departamentinin rəhbəri Murad Mirzəyevin moderatorluğu ilə baş tutacaq. İzmir Bakırçay Universitetinin Səhiyyənin İdarəedilməsi Departamentinin Tibb üzrə fəlsəfə doktoru Seda Kumru, Ankara Bilkent Şəhər Xəstəxanasının Ürək Damar Xəstəxanasının Baş həkim müavini, keyfiyyət və akkredetasiya baş yoxlayıcısı İlhan Aydın, Abşeron Rayon Mərkəzi Xəstəxanasının direktoru Azər İsmayılov, “Modern Hospital”ın icraçı direktoru Ravil Tağıyev və TƏBİB-in layihələrin idarəolunması şöbəsinin rəhbəri Fəqan Həsənzadə çıxış edib.

"Səhiyyədə İnnovasiyalar və Rəqəmsallaşdırma" paneli İnnovasiya və Rəqəmsal İnkişaf Agentliyinin Rəqəmsal Hökumət layihələrinin və məhsullarının idarəolunması departamentinin rəhbəri Elnur Məmmədli moderatorluğu ilə baş tutacaq. Panel zamanı Adam.az platformasının təsisçi və icraçı direktoru Ülvi Mirzoyev və TƏBİB-in Data analitika şöbəsinin rəhbəri Kamran Qasımov , “Genext Healthcare Solution” şirkətinin təsisçisi Merve Sarikaya Can və Antiinhisar və İstehlak Bazarına Nəzarət Dövlət Xidməti | Haqsız rəqabət və reklam qanunvericiliyinə nəzarət şöbəsinin müdiri Şahin Nağıyev panelin spikerləri olub.

Səhiyyə Nazirliyinin İctimai Səhiyyə və İslahatlar Mərkəzinin direktoru Qəhrəman Haqverdiyev, Laçın Rayon Mərkəzi Xəstəxanasının direktoru Orxan Cəbrayıl və Vəkillər Kollegiyası Rəyasət Heyətinin üzvü Sevinc Alızadə isə tədbirin məruzəçiləri qismində çıxış ediblər.

Tədbir Qaçqınların və Məcburi Köçkünlərin İşləri Üzrə Dövlət Komitəsinin təşkilati dəstəyi, "Medsol" MMC, BeIT&Partners şirkətlərinin sponsorluğu, “Başkent” restoranlar şəbəkəsinin, Dayaq Patronaj Xidmətinin dəstəyilə keçirilib.