TƏBİB-in xəstəxanalarında işləyənlərin sayı açıqlanıb

Hazırda TƏBİB-in tabeli tibb müəssisələrində 94 min 84 nəfər əməkdaş çalışır.

Medicalmedia.az xəbər verir ki, bu barədə TƏBİB-in icraçı direktoru Vüqar Qurbanov qurumun 5 illik fəaliyyətinə həsr olunan hesabat tədbirində çıxışı zamanı deyib.

Onun sözlərinə görə, onlardan 53 min 389 nəfəri tibb heyətidir.

V.Qurbanov həmçinin xatırladıb ki, ixtisaslı kadr çatışmazlığının aradan qaldırılması üçün 17 tibb müəssisəsində xarici ölkələrdə təhsil almış 102 həkim-mütəxəssis işə qəbul edilib.

O həmçinin bildirib ki, “İcbari tibbi sığortanın tətbiqinə başlayanda 1829 tibbi xidməti ödənişsiz əldə etmək olurdu. Bu gün isə Xidmətlər Zərfindəki xidmət sayı 81% artırılaraq 3315-ə çatdırılıb. İcbari tibbi sığorta təminatına alınmış 3315 sayda tibbi xidmətin 90% faizdən çoxu isə TƏBİB-in tabeliyində olan tibb müəssisələrində icra edilir”.

Onun sözlərinə görə, 634 sayda olan ambulator tibbi xidmətlərin 98%-i, 931 sayda laborator xidmətlərin 100%-i, 77 sayda fizioterapiya və reabilitasiya xidmətlərinin – 100%-i, 266 sayda stasionar terapevtik xidmətlərin – 99%-i, 1334 sayda stasionar cərrahi xidmətlərin – 70%-i, həmçinin ilkin səhiyyə və təcili təxirəsalınmaz tibbi yardım xidmətlərinin 100%-i icra edilir”.

V. Qurbanov yeni əlavə edilən xidmətlərin sırasında böyrək, qaraciyər, sümük iliyi transplantasiya əməliyyatlarının olduğunu da xatırladıb:

“Hazırda bu əməliyyatlar, əsasən, icbari tibbi sığorta çərçivəsində müqaviləli özəl tibb müəssisələrində icra olunsa da, gələcəkdə TƏBİB-in tabeliyindəki tibb müəssisələrində də belə əməliyyatların keçirilməsi nəzərdə tutulub. Növbəti illərdə sümük iliyi transplantasiyası əməliyyatının Yeni Klinikada tətbiqi planlaşdırılır. Bunun üçün artıq həkim-cərrahlarımız Türkiyədə təlimə göndəriliblər”.