«İstedad sərhəd tanımır» adlı tədbir keçirilir

“Əlilliyi olan şəxslərə sosial dəstək” ictimai birliyi Azərbaycan Respublikasının Mədəniyyət Nazirliyinin və Azərbaycan Milli Xalça Muzeyinin dəstəyi ilə 26 aprel 2024-cü il tarixdə «Aprel Autizm Maarifləndirmə ayı» və 5 may «Əlilliyi olan şəxslərin hüquqlarının müdafiəsi günü»nə həsr olunmuş «İstedad sərhəd tanımır» adlı tədbir təşkil edilib.

Medicalmedia.az xəbər verir ki, “Əlilliyi olan şəxslərə sosial dəstək” ictimai birliyi məhz 1989-cu ilin məhz bu günündə, aprel ayının 26-da Azərbaycan Əlillər Cəmiyyətinin Yasamal rayon Əlillər Təşkilatı adı ilə təsis olunaraq fəaliyyətə başlamışdır. 2019-cu ildə birlik AR-sının Ədliyyə Nazirliyinə müraciət edərək sərbəst təşkilat kimi “Əlilliyi olan şəxslərə sosial dəstək” ictimai birliyi olaraq fəaliyyətini davam etdirir. Birlik öz fəaliyyəti dövründə bir çox layihələrə imza atmış, əlilliyi olan şəxslərin hüquqlarının qorunması, sosial müdafiəsi, təhsili, sağlamlığı, cəmiyyətə inteqrasiyası və məşğulluğu sahəsində çox sayda keyslər icra etmişdir. Bu gün eyni zamanda Birliyin təsis olunmasının 35 ili tamam olur.

Tədbirdə əlilliyi olan uşaqların iştirakı ilə bədii hissə təqdim olunaraq, uşaqların istedad və bacarıqları ictimaiyyətə təqdim olunacaq.

Tədbirin ikinci hissəsi əlilliyi olan şəxslərin, autizm və daun sindromlu uşsqların əl işlərinin satış yarmarkasından ibarət olacaq.

Tədbirə yüksək vəzifəli şəxslər, təşkilat rəhbərləri, psixoloji mərkəzlərin nümayəndələri və digər qonaqlar dəvət edilib.

Tədbirin sonunda tədbirdə iştirak edən əlilliyi olan uşaq və gənclərə «İBİS» oteli tərəfindən hədiyyələr, “Əlilliyi olan şəxslərə sosial dəstək” ictimai birliyi isə iştirakçılara, könüllülərə və tədbirə dəstək olan Azərbaycan Milli Xalça Muzeyinin rəhbərliyinə, «İBİS» otelin nümayəndəsinə Təşəkkürnamə təqdim edəcək.

Tədbirin sərgi hissəsi 26-27-28 aprel tarixlərində davam edəcək.