Dərman vasitələrində içlik vərəqələrinin olmamasına - Rəşad Mahmudovdan ETİRAZ

Analitik Ekspertiza Mərkəzi dərman vasitələrinin içlik vərəqələri ilə bağlı müzakirə edilən məsələyə aydınlıq gətirib.

AEM-nin sosial hesabında belə bir məlumat paylaşılıb:

"Dərman vasitələri üçün içlik vərəqələrinin Azərbaycan dilində olması tələbi idxalçılar üçün müəyyən çətinliklər yaradır. Belə ki, bəzi hallarda xarici dərman şirkətləri Azərbaycan dilində içlik vərəqələri hazırlamaqda maraq göstərmirlər. Bu baxımdan, "Dərman vasitələri haqqında” qanuna təklif edilən dəyişiklikdə dil məhdudiyyətinin aradan qaldırılması, həmçinin türk, rus və digər dillərdə də içlik vərəqələrinin qəbul olunması məqsədəmüvafiq hesab edilir. Bu təklif bəzi ekspertlər və əhalini müəyyən təbəqəsi tərəfindən düzgün dəyərləndirilməmiş və bir sıra yalnış açıqlamalara səbəb olub. Bildiririk ki, sözügedən məsələ apteklərdən dərman alan əhali üçün heç bir narahatlıq yaratmayacaq. Belə ki, qanuna təklif edilən dəyişikliklərdə dərman vasitəsinin qeydiyyat vəsiqəsinin sahibi tərəfindən xarici dildə olan içlik vərəqəsinin Azərbaycan dilinə tərcümə edilərək, notariusda təsdiq edilmiş variantının Səhiyyə Nazirliyinin müvafiq qurumuna təqdim olunması nəzərdə tutulur. Həmin məlumat xüsusi yaradılacaq elektron bazaya yüklənəcək. Bu zaman istənilən alıcının dərman vasitəsini əldə etdiyi aptekdən dərman içliyini tələb etmək imkanı yaranır. Vətəndaşın tələbinə əsasən əczaçı xüsusi yaradılacaq elektron sistemdən konkret dərman vasitəsinin içliyini çap edərək, vətəndaşa təqdim edə biləcək".

Milli Məclisin Səhiyyə Komitəsinin sədr müavini Rəşad Mahmudov bu məsələyə narazılıq ifadə edib:

Millət vəkili Analitik Ekspertiza Mərkəzinin sosial hesabında paylaşımına belə reaksiya verib:

"Təqdirəlayiq dəyişiklərdir. Amma sözügedən mövzu ilə əlaqəli bəzi suallarım olacaq;

1. Bu məsələyə bu şəkildə yanaşma səhiyyəsinə və dərmanlarına güvəndiyimiz ölkələrin təcrübəsində varmı?
2. Bunun reallaşdırmanın praktiki cəhətdən mümkünlüyü və əlavə maliyyə yükü hesablanıbmı?
3. Hazırda ölkəyə idxal olunan bütün dərman vasitələrinin içində Azərbaycan dilində içliklər var. Bunun əksini etməyimizin səbəbi nədir?
4. Bu dəyişikliklərdir gələcəkdə hesablamadığımız əlavə problemlər yarada bilərmi?"

Sevinc Hüseynova