Azərbaycanlı alimlərdən dünya səviyyəli uğur - VİDEO

Azərbaycan Pediatrlar Assosiasiyasının Ulu Öndər Heydər Əliyevin 100 illik yubileyinə həsr olunmuş 41-ci Milli Qurultayı yekun toplatısı keçirilib. Tədbirdə Beynəlxalq Pediatriya Assosiasiyası , Rusiya Pediatrlar İttifaqı, TƏBİB, Azərbaycan Tibb Universiteti, İctimai Səhiyyə və İslahatlar Mərkəzi, digər səhiyyə təşkilatları və dövlət qurumlarından rəhbər şəxslər, millət vəkilləri, nümayəndələr, Azərbaycan, Türkiyə, Rusiya, eləcə də Avropa və Asiya ölkələrindən tanınmış səhiyyə işçiləri, elm xadimləri iştirak edib. Qurultayda 350-ə yaxın pediatr iştirak edib müxtəlif ölkələrdən 65-dən çox məruzəçi dinlənilib.

Həmçinin Azərbaycan səhiyyə sahəsində beynəlxalq uğura imza atan həkimlərin uğuru qeyd olunub.

Medicalmedia.az xəbər verir ki, yerli həkimlərin icra etdikləri əməliyyat müalicə üsulu kimi beynəlxalq klinik protokola daxil edilib.
Belə ki, 2019-cu ildə Mərkəzi Gömrük Hospitalında Homoziqot ailəvi hiperlipidemiya diaqnozu ilə müraciət etmiş 5 yaşlı uşağa eyni seansda aorta koronar şuntlama əməliyyatı və qaraciyər transplantasiyası əməliyyatı icra olunub. Bunun sayəsində əldə edilən nəticə dünyada çarəsi olmayan xəstələr üçün ümid qapısını açıb.

İlk dəfə 13 noyabr 2019-cu il tarixində tanınmış ürək-damar cərrahı, t.e.d., Dr.Rəşad Mahmudov və komandası süni qan dövranı cihazına girilmədən ürəyin tac damarının dəyişdirilməsini müvəffəqiyyətlə icra edib.

Ardından eyni seansda cərrah-transplantoloq, t.f.d., Dr.Mircəlal Kazımi və komandası tərəfindən əmisinin donorluğu ilə qaraciyər transplantasiyası icra olunub. Bu əməliyyat yazılı dünya tibb ədəbiyyatında ilk icra olunan əməliyyat kimi “Elsevier” nəşriyyat evinə daxil olan nüfuzlu “Transplantation Proceedings” jurnalında dərc edilib.

Azərbaycanlı həkimlərin uğurunun əsası ondan ibarətdir ki, Amerikanın ən nüfuzlu elmi jurnallarından biri olan “Nature” jurnalında bir neçə gün əvvəl yayımlanan “Internatinonal Atherosclerosis Society guidance for implementing best practice in the care of familial hypercholesterolaemia” müalicə protokoluna bu yanaşma daxil olaraq ona istinad edilib.

Qeyd edək ki, Amerikanın verdiyi statistikaya görə, hazırda dünyada ortalama 43 min insan bu nadir görünən xəstəlikdən əziyyət çəkir. Bu xəstələrin müalicə olunmadığı zaman 10 yaşına qədər olanların böyük hissəsi, qalanları isə 15-16 yaşına qədər infarktdan və insultdan vəfat edirlər.