Terapevtdən çağırış: Bu qidalardan uzaq durun

“Həzmin pozulmasının əlamətləri qarında ağrı və ya hansısa narahatlıq yarada bilir. Bu sağ və ya sol qabırğaaltı, kürək və epiqastral nahiyyədə ağrılar, gəyirmə, döş sümüyü arxasında yanma, qıcqırma, qəbizlik, ishal kimi müşahidə oluna bilər”.

Bu sözləri həkim-terapevt Nahid Məhərrəmov deyib.

Səhiyyə Nazirliyinin yaydığı məlumatda bildirilir ki, ekspert həzm pozulması simptomlarını belə sıralayıb: “Oturaq həyat tərzi və qeyri-sağlam qidalanma həzmsizliyə yol açır. Bunlara aiddir: tez-tez, az çeynəyərək yemək və ya çoxlu yemək, yeməkdən dərhal sonra uzanmaq, çox yağlı qidaların qəbulu, spirtli və qazlı, kofein və ya şəkər tərkibli içkilər, həmçinin tütün məhsullardan müntəzəm istifadə, stres, təşviş və digər psixoloji problemlər, piylənmə, dərmanların nəzarətsiz qəbulu, nizamsız yuxu rejimi”. N.Məhərrəmov qeyd edib ki, simptomlar arasında ən çox yayılmış olanı yemək əsnasında meydana gələn erkən doyma hissidir: “Bu, qarında şişkinlik, gəyirmə, ürəkbulanma və ya ürək yanması ilə müşayiət oluna bilər. Həzmsizliyi müalicə etmək üçün öncə düzgün qidalanmaq, stresdən uzaq durmaq, yuxu rejimini bərpa etmək, aktiv olmaq lazımdır”.

Həkim terapevt “yaz-yay mövsümündə adətən hansı qidalar mədə bağirsaq sisteminin fəaliyyətində çətinlik yaradır?”- sualına cavabında vurğulayıb ki, konservləşdirilmiş məhsullardan çox istifadə ilin bütün fəsillərində mədə bağırsaq sistemində problem yarada bilər: “Yaz-yay aylarında bu məhsulları mümkün qədər az istifadə etmək lazımdır. Duzlu və hisə verilmiş balıq məhsulları, xəmir yeməkləri və çox yağlı qidalardan da az istifadə olunması tövsiyə olunur”.