Maskalı şəxslər həkimin evinə basqın etdi – professorun və həyat yoldaşının əl-qolunu bağladılar

Bir müddət öncə tanınmış uroloq, professor Kamal Abdullayevin evinə basqın olub. Hadisə Binəqədi rayonu, Varovski qəsəbəsində baş verib. Binəqədi Rayon Polis İdarəsindən Xəzər TV-yə verilən məlumata görə, zərərçəkmiş həkim gecə vaxtı maskalı şəxslərin onun 3 mərtəbəli evinə hücum çəkdiyini bildirib. Cinayətkarlar əvvəlcə həkimin, sonra isə həyat yoldaşının əl-qolunu bağlayıb, onlara işgəncə veriblər. Daha sonra basqınçılar Kamal Abdullayevin evindən 5800 ABŞ dolları, 2200 AZN, dəyəri 55 000 Avro olan bir ədəd qol saatı, 3 ədəd mobil telefon və xəncər götürüblər. Polisin apardığı axtarış-əməliyyat tədbirləri nəticəsində cinayətkarlar saxlanılıblar. Onlar Bakı şəhər sakinləri əvvəlcə məhkum ollunmuş Anar Əmirli, Bəhruz Hacızadə, Bərdə rayon sakinləri Natiq Musayev və onun əmisi oğlu Elməddin Musayevdir. Məlum olub ki, cinayət yoluyla əldə edilən pul və qiymətli əşyalar saxlanılanlar arasında bölünüb. Ev sahibinə məxsus olan qol saatı isə dəstə üzvü Elməddin Musayevdən aşkar edilərək götürülüb. Dəstə üzvləri ifadələrində hadisəni törətdiklərini boyunlarına alıblar. Onlar barəsində Binəqədi Rayon Polis İdarəsində cinayət işi başlanıb.