Bu gün Ümumdünya Anesteziya Günüdür

16 oktyabr – Ümumdünya Anesteziya Günüdür.

Medicalmedia.az xəbər verir ki, cərrahi əməliyyatlar zamanı ağrıya qarşı mübarizə keçmiş dövrlərdə təbabətin ən çətin məsələlərindən biri olub. O zaman aparılan cərrahi əməliyyatlar zamanı ya əməliyyat lazımi səviyyədə icra edilməyib, yaxud da ağrının şoku xəstələrin həyatını itirməsi ilə nəticələnib.

Uzunmüddətli axtarışlardan sonra 16 oktyabr 1846-cı ildə diş həkimi Uilyam Tomas Morton tibb tarixində ilk dəfə olaraq Boston şəhərinin mərkəzi xəstəxanasında boyun şişinin cərrahi əməliyyatının ağrısız icrası üçün efir narkozunu tətbiq edərək anesteziologiyanın əsasını qoyub. Bu tarix – 16 oktyabr günü dünyada cərrahiyyənin inkişaf tarixinin başlanğıcı günü kimi qeyd olunur.

Cəmiyyət inkişaf etdikcə bu sahə də təkmilləşərək tibbin ayrılmaz hissəsinə çevrilib. Ondan yalnız cərrahi əməliyyatlar zamanı deyil, həm də psixiatriya, narkologiya və digər sahələrdə istifadə olunmağa başlayıb. Müasir tibdə ümumi, yerli və bel anesteziyasından istifadə edilir və bu sahə daim təkmilləşir.